Эцэг эхчүүд болон гэр бүлийн гишүүд хүүхдийн ахлах ангийн хичээл сонголт, 12 дугаар анги төгссөний дараах боловсрол, сургалт болон ажил мэргэжлийн сонголтод хамгийн их нөлөөтэй байдаг. Зарим эцэг эхчүүд хүүхдийн сонголтод их нээлттэй ханддаг, зарим нь хүүхдийнхээ сонголтыг ерөөс сонирхдоггүй. Зарим эцэг эхчүүд хүүхэдтэйгээ энэ талаар ярилцаагүй байсан ч хүүхдүүд нь эцэг эхийнхээ үй хөдлөл, ярианаас юу сонгох хэрэгтэйгээ ойлгосон байдаг. Эцэг эхийн нөлөө заримдаа эерэг үр дүнг авчирдаг заримдаа сөрөг үр дүнтэй байдаг.  Цаг хугацаа өнгөрөхийн хэрээр аливаа зүйлс өөрчлөгддөг. Бидний хүүхэд эдийн засгийн, ажил хөдөлмөрийн өөр орчин, өөр нөхцөлд ажиллаж, амьдрах болно. Бидний үеийн хөдөлмөрийн зах зээлийн өнгө төрх хүүхдүүдийн үед өөр байх болно. Бидний мэддэг ажил мэргэжлийн боломжууд тэднийг ажил хөдөлмөр эрхлэх үед байх боломжтой нийцэхгүй болно. 

Дараах хүснэгтэд эцэг эхчүүд хүүхдүүддээ ажил мэргэжлийн чиг баримжаатай холбоотой зөвлөгөө өгөхөд туслах зарим санааг үзүүллээ. Эдгээр нь эцэг эх хийж болох бас хийж болохгүй гэж ангилагдсан болно

ХҮҮХДЭДЭЭ ХЭРХЭН ТУСАЛЖ ДЭМЖИХ ВЭ?

• Тэдэнд өөрийн хүйс болон уламжлалд баригдалгүйгээр бүх ажилд ач холбогдол өгөхөд туслах
• Ажил хөдөлмөр эрхлэхэд шаардагдах боловсрол, сургалтын бүх боломжид ач холбогдол өгөхөд туслах
• Тэдний ажил мэргэжлийн талаарх мөрөөдлийг бүү няцаа, сургуулийн орчны болон гадуурх ажил мэргэжлийн чиг баримжааны үйл ажиллагаагаар дамжуулан хүсэж, мөрөөдөж буй ажил мэргэжилтэй холбоотой бүх асуудлын талаар судалж мэдэх, таньж мэдэхэд хүүхдэдээ дэмжлэг үзүүлэх
• Ажил мэргэжлийн төлөвлөлт хийхэд сургуулийн орчны болон гадуурх нөөц боломжийг сайн мэддэг байх
• Ажил мэргэжилтэй холбоотой боловсрол сургалтын бүх төрлийн (МБС, их дээд сургууль, зайны болон цахим сургалтын өдрийн, эчнээ болон оройн сургалт, төрийн өмчийн болон хувийн) боломжийн талаар сайн мэддэг байх
• Суралцагчийн гарын авлага, ажил мэргэжлийн төлөвлөлтийн агуулгатай танилцаж, сайн мэддэг байх
• Хүүхэдтэй хамт суралцагчийн гарын авлагын дасгалыг ажиллах
• Их дээд сургуулийн элсэлтийн шалгалтад бус хүүхдийнхээ ажил мэргэжлийн сонголтод анхаарал хандуулах
• 12 дугаар анги төгссөний дараах ажил хөдөлмөр, боловсрол, сургалтын бүх боломжийг авч үзэх, зөвхөн их дээд сургууль гэж туйлшрах хэрэггүй
• Сургуулиас зохион байгуулах эцэг эхэд зориулсан ажил мэргэжлийн мэдээллийн уулзалтад идэвхтэй оролцох
• Хүүхдээ сонирхож буй ажил мэргэжлийн талаар мэдээлэл цуглуулах, туршлага судлах, энэ чиглэлээр сургуулийн орчны болон гадуурх үйл ажиллагаанд оролцоход дэмжих
• Хүүхдээ ажил мэргэжлийн, боловсрол, сургалтын талаар олон хувилбартай сонголт хийхэд туслах
• Хүүхдээ тэвчээртэй сонсох, асуулт асуух
• Хүүхдийнхээ ажил мэргэжилтэй холбоотой зарим асуултад шууд бэлэн хариулт хэлж өгөхөөс илүүтэй энэ асуултын хариултаа өөрөө олж мэдэхэд дэмжлэг үзүүлэх, асуултынхаа талаар судлах, олж мэдсэн хариултаа эцэг эхдээ мэдээлэх үүрэг өгөх 
• Хүүхдийнхээ сонирхож буй ажил мэргэжил болон холбогдох боловсрол, сургалтын талаарх зарим асуултад өөрийн чадах хэрээр сайн хариулах, хэрэв хариулж мэдэхгүй бол энэ талаар хүүхэдтэйгээ хамт судалж, эрэл хайгуул хийх
• Ажил мэргэжлийн янз бүрийн сорил ашиглан хүүхэддээ сонирхож буй ажил мэргэжлийн чиглэлээр өөрийнх нь чадвар, үнэт зүйл нь тухайн ажлын шаардлагатай нийцэх эсэх талаар таньж мэдэхэд туслах 
• Хүүхдийнхээ сонирхож байгаа ажил мэргэжил, боловсрол, сургалтын цаашдын төлөвийн талаарх өөрийнхөө итгэл үнэмшлийг шалгаад үз, энэ чиглэлээр боловсрол, сургалтын байгууллагад суралцаж төгссөн төгсөгчдийн хөдөлмөр эрхлэлтийн статистикийг судлах, хөдөлмөрийн зах зээлийн хэрэгцээний талаар анхааралтай судлах (энэ мэдээллийг Хөдөлмөр, нийгмийн хамгааллын судалгааны институтаас жил бүр хэвлүүлдэг тайлангаас авч болно)
• Ажил мэргэжил, хөдөлмөрийн зах зээл, боловсрол, сургалтын талаар олон нийтийн мэдээллийн хэрэгслийн мэдээ, нэвтрүүлгийг анхааралтай сонсох
• Хүүхэдтэйгээ хамтран ажиллах, тэдэнд зөвлөх, дэмжлэг үзүүлэх
• Анги удирдсан багш, нийгмийн ажилтантай нь шаардлагатай бол зөвлөлдөх
• Шаардлагатай бол хүүхдээ дагуулаад сонирхож буй ажил мэргэжлийн чиглэлийн байгууллагад очиж ажлын нөхцөл, орчинтой танилцаж, холбогдох мэргэжилтэн, ажилтантай уулзах, ажлын байранд богино хугацаанд ажиглалт хийж, дүгнэлт хийхэд дэмжлэх үзүүлэх
• Сонирхсон ажил мэргэжилтэй холбоотой боловсрол, сургалтын байгууллагад хүүхэдтэйгээ хамт очиж, суралцах орчин, сургалт, мэргэжлийн хөтөлбөрийн ялгааны талаар холбогдох мэргэжилтэн, оюутан, суралцагчидтай уулзаж ярилцах 

ХҮҮХДЭДЭЭ ЮУГ ХИЙЖ БОЛОХГҮЙ ЗҮЙЛ

• Хүүхдийн ажил мэргэжлийн талаарх санал бодол, хүсэл сонирхлыг бүү няцаа, үгүйсгэ! Сонирхож буй ажил мэргэжлийн талаар өөрөө судалж мэдэх, өөрийнхөө нөөц боломжийн хязгаарыг танихад дэмжлэг үзүүл!
• Ажил мэргэжлийн талаарх өөрийнхөө төсөөлөл, өнгөц дүгнэлтийг бүү хэл!
• Өөрийн итгэл үнэмшил, үзэл бодлоо хүүхдэдээ бүү тулга!
• Өөрийнхөө биелүүлж чадаагүй хүсэл мөрөөдлөө хүүхдээрээ хийлгэх гэж бүү оролд!
• Тэдний хүсэл сонирхлыг хэтэрхий бүү хяна!
• Тэдний өмнөөс дангаараа бүү шийдвэр гарга!
• Тэдэнд хэтэрхий их нөлөөлөх гэж бүү оролд!