Ажил мэргэжлийн чиг баримжаа олгох үйл ажиллагааны цөм нь төрөл бүрийн эх сурвалжаас, тэр дундаа интернетээс мэдээлэл цуглуулах, судалгаа хийхэд оршдог. Тиймээс сургуулийн орчинд болон сургуулиас гадуур интернет холболттой байх нь хамгийн чухал. Интернетийн холболт байхгүй эсвэл хурд нь муу байдаг сургуулиудын хувьд ном гарын авлага, хэвлэмэл материал зайлшгүй хэрэг болно. Сургууль номын сандаа ийм материал хэрэглэгдэхүүнтэй байх явдал ажил мэргэжлийн чиг баримжаа олгох үйл ажиллагааг үр дүнтэй хэрэгжүүлэх нэг хүчин зүйл юм. 

Ахлах ангийн ажил мэргэжлийн чиг баримжаа нь дараах зорилтуудтай. Үүнд:

• Өөрийн сонирхол, авьяас, чадвар, эрхэмлэх үнэт зүйлд тулгуурлан ахлах ангид судлах хичээл, хөтөлбөрөө ухаалгаар сонгоход дэмжлэг үзүүлэх
• Сургууль төгссөний дараах ажил мэргэжил, боловсрол, сургалтын боломж, сонголт, түүнтэй холбоотой хэрэгцээ, шаардлагын талаар мэдлэг эзэмшүүлэх
• Сургалт болон ажил мэргэжлийн дунд, богино болон урт хугацааны төлөвлөгөө хийх, зорилго тодорхойлох, түүнийг хөгжүүлэхэд дэмжлэг үзүүлэх; 
• Ажил мэргэжлийн шийдвэрээ хэрхэн үйл хэрэг болгон хэрэгжүүлэх, энэ шийдвэртээ холбогдох мэдээлэл ашиглан үнэлгээ дүгнэлт өгөх, ахлах ангид хийх шилжилт болон сургууль төгссөний дараа их, дээд сургуульд сурах шилжилтээ үр дүнтэй удирдах; 
• Амьдралд гүйцэтгэх үүрэг, үнэт зүйлээ ажил мэргэжилтэй хэрхэн уялдахыг ойлгож ухамсарлахад дэмжлэг үзүүлэх
• Ажил хөдөлмөр эрхлэх эсвэл ажилгүй нөхцөл байдалд ороход өөрийгөө бэлтгэх, түүнээс гарах арга замыг мэдэхэд туслах
• Тодорхойгүй нөхцөл байдалд ухаалаг шийдвэр гаргаж сурахад дэмжлэг үзүүлэх